Як карыстацца матэрыяламі
Візуальныя матэрыялы (стыкеры, значкі, шэўроны, сьцяжкі, плякаты і г.п.) маюць сваім прызначэньнем:
- Ствараць адчуваньне паўсюднасьці, а значыць вялікай колькасьці, сілы прыхільнікаў свабоды ("нас большасьць")
- Быць сродкам выяўленьня Вашай жыцьцёвай пазыцыі, вашай асобы, пазыцыі Вашай групы.
- Дапамагаць пазнаваць "сваіх".
- Несьці простую, ясную інфармацыю ("я за свабоду"), прыцягваць да яе ўвагу.
- Прывабліваць да сябе, а значыць да ідэі, якую выяўляюць. (У некаторых выпадках яны могуць выклікаць раздражненьне й нават агрэсію з боку вашых ідэйных праціўнікаў, але гэта таксама вынік – моцная рэакцыя лепш, чым абыякавасьць.)
Стыкеры(налепкі)
СВАБОДА, Я ЗА СВАБОДУ, 2006 – ГОД СВАБОДЫ, СВАБОДНАЯ ПРАСТОРА.
Стыкеры малога фармату не прызначаныя для наклейваньня на муры ці платы, а тым болей, на скрыні для сьмецьця. Гэта аналяг значкоў, якія больш паказваюць вашую асабістую пазыцыю, чым заклікаюць грамадзянаў адразу далучацца. Таму лепш ужываць іх для рэчаў прыватнага карыстаньня – тэчак, нататнікаў, кампутараў, партфеляў і г.п.
Стыкеры большага фармату (СВАБОДА, СВАБОДНАЯ ПРАСТОРА) можна ўжываць у месцах, дзе яны не выклікаюць эстэтычнага раздражненьня, не выглядаюць як "бруд" ці "псаваньне". Такімі месцамі могуць быць шчыты для аб'яваў і рэклямы, транспартныя прыпынкі, слупы, у некаторых выпадках ліфты, дзьверы пад'ездаў. У любым варыянце матэрыял павінен быць наклеены акуратна, густоўна. Эфэктна, часам, выглядаюць налепкі, наклееныя "блёкам" – па некалькі штук разам.
Калі ў вас ёсьць аўтамабіль, можна ўпрыгожыць яго вашым лёзунгам, прапанаваць яго прыяцелям і калегам.
Для муроў і плотаў лепш выкарыстоўваць трафарэты для нанясеньня малюнка ці надпісу фарбай. Неахайныя надпісы ў недарэчных месцах выклікаюць больш негатыўных пачуцьцяў да іх аўтараў, як да хуліганаў, чым адчуваньня салідарнасьці зь іхнымі ідэямі.
Значкі
– Можна насіць іх ня толькі на куртцы, кашулі ці марынарцы. Модна цяпер начапляць іх на торбы і заплечнікі, можна ўпрыгожыць джынсы, шапку ці шалік. Каб значок не згубіўся ў вулічнай мітусьні, раім "прыхапіць" яго да тканіны ніткамі.
Шэўроны
– нашыўкі для вопраткі. Ідэальнае месца для іх на левым рукаве курткі. Але неблага глядзяцца шэўроны і на нагруднай кішэні альбо на джынсах. Крута таксама прышыць шэўрон на бэрэтку (калі насіць яе “набок”, як жаўнэры, дык лепш прышыць знак збоку) ці фуражку.
Важна толькі, каб сымболіка не выглядала недарэчна, бязгустоўна ці занадта сьмешна.
Шэўроны можна прышыць проста да вопраткі, а можна ўзяць так званую кантактную стужку (“ліпучку”) і замацавацьадну палову на шэўроне, а другую на вопратцы. Тады шэўрон можна пры неабходнасьці зьняць.
Свабодная прастора
Налепкі “Свабодная прастора” дапамогуць прадэманстраваць усім, што там, дзе ёсьць мы – свабодныя людзі, там Беларусь становіцца вальнейшай. Пазначаем тэрыторыю, дзе свабода мае сваіх валянтэраў, дзе не пануе страх і абыякавасьць і цяжка дыхаць не нам, а рэжыму.
Гэтыя налепкі можна выкарыстоўваць 2 асноўнымі спосабамі:
Меншымі стыкерамі можна адзначыць сваё працоўнае месца, офіс, кватэру, хату.
Большыя стыкеры падыходзяць да сплянаваных акцыяў. Напрыклад: “вызвалім свой горад (вёску, раён, квартал)”: Адначасова расклеіваем у бачных (але дарэчных, глядзі вышэй) месцах шмат налепак. Калі акцыя заўважная вялікай колькасьці людзей, яна выклікае рэакцыю – хтосьці падтрымае, хтосьці задумаецца, хтосьці хай сабе спалохаецца ці раззлуецца. Хаця б хвіліна неабыякавасьці – гэта ўжо дасягненьне.
Такія адзнакі свабоды можна падтрымліваць у сваёй тэрыторыі пастаянна.
Падобныя па ідэі акцыі ўжо ладзіла некалі моладзь і яны добра запаміналіся. (“Горад наш”, “Тэрыторыя свабодная ад лукашызму”)
Трафарэты
Шмат хто цяпер малюе ды піша на сьценах. Нямала людзей пацярпелі ўжо за свае палітычныя графіці. Знак ці надпіс на сьцяне, ў заўважным месцы, спрацоўвае на вялікую колькасьць людзей. Але часта выклікае слушнае незадавальненьне жыхароў. Неахайныя, у недарэчных месцах, графіці, нават з самым лепшым зьместам нікому не падабаюцца, выклікаюць адчуваньне бруду. Але акуратна зробленыя, у месцах, дзе яны не псуюць асяродьдзе, сымбалі і лёзунгі могуць выдатна працаваць.
Мы прапануем карыстацца трафарэтамі. Трафарэт плюс фарба з балёнчыка даюць магчымасьць за некалькі сэкундаў зрабіць прыгожы ахайны малюнак. Лепш за ўсё рабіць свае графіці на месцах, якіе “нікому асабіста не належаць” – на агарожах, на доўгіх сумных мурах нежылых будынкаў, можна на асфальце, на слупах. Пазьбягайце рабіць графіці ў месцах, якія людзі лічаць сваёй прыватнай тэрыторыяй – на жылых дамах, ля ўваходаў у крамы, на прыватных пабудовах – гэта будзе выклікаць незадаволенасьць. Калі вы – за свабоду, не парушайце правы іншых на сваю прастору.
Камэнтары і заўвагіУвага: не пішыце сюды замовы на атрыбутыку і дыскі, калі вы хочаце замовіць значкі ці нашыўкі - вам сюды, калі дыскі - сюды. |
